Tempo de recollida

Estamos nos momentos finais do curso. É tempo de recoller.
Onte recollemos os froitos da horta e fomos ao Concello acompañados tamén da profe María para ver alí expostos os nosos murais da campaña "TBO e non che creo" sobre a prevención do consumo de alcohol.
Hoxe adicamos boa parte da clase a recoller os traballos e os exames.

E xa no final recibimos as felicitacións da vicepresidenta e as colaboradoras de AECC polo traballo realizado na cooperativa:  a doazón de parte dos beneficios para a prevención do cancro. Logo de amosarnos o traballo que realizan na Asociación déronnos uns agasallos e unha placa conmemorativa na que se recolle o seu agradecemento pola colaboración e o interese dos socios da cooperativa.

Mañá, recolleremos as notas e levaremos parte dese traballo realizado ao longo do curso; e levaremos tamén unhas ganas enormes de xogar e descansar... Por fin!

Vicki remata o curso expoñendo unha excelente ppt sobre a Idade Moderna e Olalla amósanos xogo das Ilusións Ópticas que trouxo a clase. Un excelente final.

Saimos na tele

Hoxe, a partir das nove e media podedes ver a entrevista que a canle "Rías Baixas" lles fixeron  aos nosos patrulleiros.

Patrullas Urbanas, contacontos, guías, teatro ...

Moitas actividades para un mesmos día.
Martiño, Vicki, Carolina e Candela inauguraron o programa de Patrullar Urbanas da man de Gil, o monitor da Policiía Local de cambados que, no día de hoxe estivo acompañado tamén do xefe da Policía Local. E a ocasión ben o merecía. Os rapaces fixeron un precioso traballo. Van aprender pouco a pouco como coordinarse e como proceder en cada momento, pero, de seguro, conseguirán maior seguridade para o deambular dos nosos alumnos e alumnas e tamén a mellor circulación dos vehículos diante do centro. Mil grazas, equipo.

Logo máis de media clase creou un marabilloso contacontos para recibir aos pequerrechos da pastora: "Noite de mudanzas". O certo é que lles quedou tan ben feita que a profe Paula lles pedíu que a repetisen para os nenos e nenas de terceiro durante o Plan Lector.

O resto da clase fixeron de guías na horta e tiveron que explicarlles aos máis cativos  cales eran as plantas que alí tiñamos: acelgas, espinacas, chícharos, fabas e xudías, pepinos, calabacíns, pementos, repolos, patacas, tomates, cebolas, perexil, albahaca, leitugas e amorodos! Case nada!. Deixamos colocados carteis identificativos de cada especie. O certo é que os carteis son moi de agradecer, mesmo para o alumnado de quinto, que non sempre recorda o nome de cada especie!!!

E para rematar a xornada Salomé, Olalla, Vicki e outro 15 alumnos e alumnas do centro dos diferentes cursos estarán ás catro da tarde no auditorio para representar a obra de teatro "50 anos. Vaia historia!" que relata pequenas pinceladas que conforman a vida dun centro, e que inclúen tamén un pequeno recordo a outros tempos. De novo mil grazas, raparigos e raparigas de quinto.

Concerto do 50 aniversario

Cincuenta anos de historia ben merecen unha celebración por todo o alto. E aí estabades vós, como magníficos interpretes de preciosas cancións que formarán parte xa da vosa historia persoal, da do colexio e da do pobo de Cambados.
Marco Lucato, Lucía González e o coro da Universidade fixeron posible un acople de voces tan perfecto. Moitas grazas a todos.
Parabéns tamén polo voso comportamento ao longo de toda a actuación, porque o voso comportamento fala de vós, e tamén dos vosos pais e nais, do voso colexio e da comunidade toda. E hoxe é un día para sentirnos moi orgullosos. Parabéns, raparigos. E moitas grazas.

Todos na horta

Hoxe fomos todos os da clase xuntos á horta. Como eramos tantos tivemos que organizar moi ben  o traballo. Un equipo responsabilizouse de mondar os chícharos (quitarlles as herbas), outro  das patacas, un terceiro de replantar leitugas, o cuarto do ceboliño e o último grupo foi o responsable de regar todas as plantas. E todo quedou rematado, aínda que nos pasamos un pouco da hora prevista! A próxima vez seremos máis eficientes.

Cos afillados

O luns recibimos a visita dos nosos afillados lectores. Traían unha carta consigo para cada un dos seus padriños. Nós agasallámolos cunha pequena postal chea de cariño e de adxectivos ben bonitos.  Sorprendeunos a nosa afillada Carolina lendo un precioso relato que ía presentar ao certame de Relato curto. Nós, tamén lles lemos o relato que a nosa Carolina  vai presentar. Rematada a lectura tres nenos de segundo recitaron un anaquiño dun poema de Rosalía de Castro. Para rematar todos os padriños e madriñas lectores recitaron o poema de Rosalía dende o inicio "Adios ríos, adios fontes" e acompañáronnos moitos dos afillados que o sabían moi ben. Foi unha experiencia moi bonita que agardamos repetir en breve.

Mediadores

Hoxe, Vicki ( e outras compañeiras do grupo de mediadores) representou unha pequena peza de teatro para ensinarnos a todos os nenos de quinto como actúan os mediadores cando alguén solicita a súa axuda para resolver un problema.
Moitas grazas Vicki, pola túa implicación en tantos recreos traballando para  axudarnos a todos.

"O libro perdido"

O Plan Lector de hoxe foi especial pois baixamos á biblioteca cos nosos compañeiros de 5ºA e alí presenciamos unha pequena representación teatral na que un libro se perdera e non sabía como atopar a súa casiña, xa que non tiña etiqueta.
Claro que os nosos Axudantes de Biblioteca do grupo de teatro se encargaron de diseñar de novo a etiqueta perdida tendo en conta o número que lle correspondería na CDU e a cor, as tres primeiras letras do apelido do autor en maiúscula e as tres do título (sen artigos) en minúscula.
Xa recuperada a etiqueta, o libro atopuu perfectamente a súa casa e nela estaba o seu inmá xemelgo á espera. Todo un éxito.

Parabéns para os actores e actrices e tamén para os axudantes de biblioteca que se aseguran de que os libros estean sempre en perfecto orde.

Elección de Delegado/a e Subdelegado/a de curso

Hoxe tiveron lugar as eleccións a delegado/a e subdelegado/a de clase.

A semana pasada iniciouse o proceso electoral e presentáronse tres candidatos ao cargo: Salomé Xabeir e Brais.
A semana pasada transcorreu  unha moi interesante campaña na que os tres candidatos defenderon o seu programa e as súas propostas, prepararon  carteis e papeletas animando ao voto e  celebramos unha mesa redonda na que os compañeiros puideron facerlles as preguntas que consideraron oportunas.

Hoxe tivo lugar o sorteo para a constitución da Mesa Electoral e procedemos á votación segundo a cal tmos como delegado a Xabier e como subdelegada a Salomé.

Parabéns para os tres candidatos por presentar as súas propostas e estaren dispostos a trabllar pola mellora da clase e do colexio.

Teatro e Coro das Emocións

Onte tivo lugar a actuación do grupo de teatro do colexio que representou as obras "Viaxe a Algunha parte" e "Coida a túa lingua". Nelas participaron tres alumnos da nosa clase. Os tres merecen a máis grande noraboa pola súa excelente actuación e por estar tan pendentes de todos os detalles para que todo saíse ben.

De seguido toda a clase, xunto cos compañeiros de 5ºA interpretaron dúas peza que xa tiñan preparadas para o Corodas Emocións. Moi bonitas as dúas e moi difíciles de interpretar.

O broche de ouro puxérono as actuacións do alumnado de 6º, realmente excelentes e que nos deixaron abraiados pola súa calidade, beleza e coordinación. Parabén a todos e moi especialmente á profesora Lucía.

Radio Patio

No día de hoxe, despois dunha semana de espera, retomamos as sesións do programa de radio para o tempo de recreo que foron preparando os grupos da aula. Empezou o grupo dos Superheroes que repetirán o programa dado que tiveron uns problemiñas de axuste nas intervencións. Seguiron cun expléndido programa do equipo dos "Inmortais" para rematar co programa preparado polo grupo "Cinco Noites". Pasámolo realmente ben escoitando a entrevista que lle fixeron á profe Mónica e a Brais. Pero tamén disfrutamos dos chistes, as adiviñas e como non, da música, que nos puxo a todos a bailar con moito ritmo. As noticias tiveron que sufrir algúns retoques porque estaban preparadas para a semana pasada e non se axustaban moito ao momento presente. Con todo cabe destacar que os radio-oíntes disfrutamos do programa e os locutores, de seguro, aprenderon a mellorar a súa vocalización e a manter o micro preto da boca cando falan!

Axudantes de biblioteca

Hoxe, dúas das nosas compañeiras estiveron facendo untraballo ben especial na biblioteca. Encargáronxe, xunto cun compañeiro de sexto curso, de supervisar a ordenación alfabética e a correcta colocación dos libros nos estantes correspondentes. Menos mal que puideron botarnos unha man porque atoparon algún libro da letra Z colocado cos da C. Menudo despiste. Moitísimas grazas raparigas.

Monitores de xogo

No cole os alumnos e alumnas de quinto e doutras aulas colaboran durante o tempo do recreo prestando un valioso servizo á nosa comunidade educativa. Neste caso foron Sabela P. , Érika e Román os responsables da tarefa. Eles foron os Monitores de xogo no patio dos pequenos. Parece ser que, desta volta tiveron moito éxito coas súas propostas dado que estiveron xogando con eles nada menos que 18 pequerrechos. Noraboa! e moitas grazas.